50% líkur á hruni evrunnar/og þennan gjaldmiðil viljum fá og ganga í ESB !!!!

50% líkur á hruni evrunnar
Erlent | mbl | 22.11.2010 | 15:58
Helmingslíkur eru á hruni evrunnar á næstu sex mánuðum, að mati Sam Bowman, sérfræðings við Adam Smith-stofnunina í Lundúnum. Bowman, sem á ættir að rekja til Írlands, telur að Írar eigi að kasta evrunni. Þá gefur hann lítið fyrir þau rök að Ísland væri í betri stöðu með evru.

Bowman fullyrðir að írska ríkisstjórnin hafi verið undir miklum þrýstingi frá Evrópusambandinu að taka við lánum til að halda bankakerfinu á floti. Hann segir aðspurður útlit fyrir háa skatta í Evrópu á næsta áratug, enda verði skattgreiðendum sendur reikningurinn fyrir neyðaraðstoð til handa Grikkjum, Írum og nær örugglega Portúgölum. Hér sé á ferð kostnaður sem flestir Írar kæri sig ekki um að þurfa að standa undir en írska stjórnin fallist engu að síður á að kröfu ESB og bankastofnana. 

Þá sé það til marks um úr hversu miklum tengslum írska stjórnmálastéttin sé við írskan almenning að hún hafi tekið Evrópusambandið fram yfir þjóð sín áður en greint var frá neyðaráætluninni, með því að ljúga að kjósendum sínum um að aðstoðin yrði ekki þegin vikuna áður en greint var frá því.

Sniðið að þörfum stóru Mið-Evrópuríkjanna

„Vandamálið var að vaxtastigið var ákveðið með hagkerfi Frakklands og Þýskalands í huga en ekki með hliðsjón af írska hagkerfinu. Risastórri fasteignabólu var leyft að verða til á Írlandi sem þýddi að allt írska hagkerfið var endurskipulagt í kringum húsnæðismarkaðinn [...]

Aðalatriðið er að eina leiðin fyrir Íra til að komast út úr þessu hvað gjaldmiðilsmál snertir er að yfirgefa evruna og taka upp írskt pund á ný, þannig að alþjóðlegir gjaldeyrismarkaðir geti endurmetið gjaldmiðilinn svo Írland geti orðið samkeppnishæft á heimsmarkaði á ný.

Launalækkanir og aðrar skerðingar sem þurfa að eiga sér stað á Írlandi yrðu þá ekki eins sársaukafullar og raun ber vitni því við erum nú fastir í spennitreyju pólitísks kerfis sem mun koma írskum launþegum og almenningi illa. Eðlileg gengislækkun sem myndi koma markaðnum til góða getur ekki átt sér stað,“ segir Bowman og á við evruna er hann ræðir um pólitískt kerfi. Þar fari gjaldmiðill sem þjóni pólitískum tilgangi fremur en efnahagslegum.

Tekur ESB fram yfir írskan almenning

„Írska ríkisstjórnin hefur meiri áhuga á að koma til móts við óskir Evrópusambandsins og Alþjóðagjaldeyrissjóðsins en að uppfylla þarfir írsks almennings. Ég held að breið gjá hafi myndast á milli stjórnmálaelítunnar á Írlandi til vinstri og hægri, í stjórn og stjórnarandstöðu, og almennings sem hefur leitt til þess að stefna ESB er tekin fram fyrir írskan almenning,“ segir Bowman og ítrekar þá skoðun sína að írska stjórnin hafi vísvitandi logið að almenningi undanfarna viku með því að halda því fram að fulltrúar Alþjóðagjaldeyrissjóðsins væru aðeins til ráðgjafar, þótt allir vissu betur.

Ísland væri verr statt með evruna

- Haustið 2008, þegar íslenska fjármálakerfið riðaði til falls, héldu talsmenn Samfylkingarinnar, verkamannaflokkur Íslands, því fram að Ísland hefði verið í allt annarri og betri stöðu ef hagkerfið hefði notast við evru en ekki krónu. Hvernig bregstu við þessari greiningu?

„Reynsla Íra sýnir að evran gerir illt verra, ekki aðeins fyrir írskan almenning heldur einnig fyrir ríki Evrópu. Írska veikin dreifist nú um Evrópu. Ef Írland hefði farið leið greiðsluþrots - sem ég tel að landið eigi að gera - hefði það leitt til mun veikari eftirskjálfta á evrusvæðinu en við horfum nú fram á.

Ég held að evran hafi frá upphafi verið pólitískt verkefni í því augnamiði að koma á  sambandsríki Evrópu. Sú röksemdafærsla að evran feli í sér efnahagslegan ávinning er eins og að halda því fram að vatn renni upp í móti þegar við viljum. Það gengur auðvitað ekki upp. Reynsla Íra hefur grafið undan þeim rökum að evran hefði skýlt Íslandi. Evran hefur þvert á móti gert stöðuna á Írlandi mun verri.“

Miklar líkur á hruni evrunnar 

- Þú minntist á það áðan að þú teldir miklar líkur á að Portúgal þyrfti á neyðaraðstoð að halda og svo hugsanlega Spánn, Frakkland og Ítalía í kjölfarið. Hvaða líkur telurðu á hruni evrusvæðisins? 

„Ég myndi segja að það væru helmingslíkur. Ég sé ekki fyrir mér að evrusvæðið verði við lýði eftir áratug. Ég tel að það sé næstum öruggt að það lifi ekki af næstu tíu árin. Hvort það lifi næstu sex mánuðina af held ég að sé stór spurning. Ég tel að það væru helmingslíkur.“

- Er staðan sem komin er upp án fordæmis frá kreppunni miklu árið 1929?

„Já. Hún er það. Þetta á sér engin fordæmi [...] Evruríkin eru nú svo samtengd vegna evrusamstarfsins. Það á sér engin fordæmi.“////eftir svona lesningu hrekkur maður við og hugsar hvað erum við að hugsa um  sumir  eða 40% að ganga þarna inn,það hlýtur að kom á menn ,og hugsa hvað erum við að spekúlera,við getum ekki annað en tekið eitthvert mark á svona fréttum og látum okkur ekki detta i hug að sækja þarna um inntöku eða meira/Halli gamli

50% líkur á hruni evrunnar

Athugasemdir

[Sigurður Haraldsson, 22.11.2010 kl. 17:08]

Samála Halli nema það að líkurnar eru 100% að Evran falli.

[Jón Gunnar Bjarkan, 22.11.2010 kl. 17:39]

Ég tel engar líkurnar á því á að evran falli.

Auk þess þá er það útbreiddur misskilningur á landinu að einhver þjóð í ESB gangi í gengum jafnalvarlega kreppu og við.

[Guðjón Emil Arngrímsson, 22.11.2010 kl. 18:34]

Þarna sjáum við það. Einn segir 100% annar 0%. Þetta þýðir væntanlega 50% áfram.

Þjóðverjar eru í þriðja skipti að reyna að sölsa undir sig Evrópu. Þetta hefur farið frekar illa hingað til. Spurningin er frekar hve víðtækar rústirnar verða þegar fallið kemur. 

United Nations of Europe, hmm. Þetta gekk nú frekar brösuglega í USA, en þeir voru þó að taka inn í versta falli lítil þjóðarbrot sem bæði gátu og urðu að sætta sig við þjóðfélagið. Þeir áhugaverðustu sem ekki féllu inn voru Amish fólkið. Hverjir skildu verða Amish í UNE?

Bara svona til að segja eitthvað. Betra rangt tré en ekkert ;-)

[Jóhann Elíasson, 22.11.2010 kl. 20:41]

Jón Gunnar Bjarkan, hefur þú eitthvað fyrir þér í mati þínu annað en óskhyggju????????

[Jón Gunnar Bjarkan, 22.11.2010 kl. 20:46]

Jóhann ertu þá að meina í sambandi við hvort evran hrynji eða að enginn ESB þjóð er að ganga í gegnum sambærilega kreppu?

[Jóhann Elíasson, 22.11.2010 kl. 22:23]

Auðvitað það fyrrnefnda hitt er bara kjaftæði nærtækasta dæmið er Írland svo þú ert strax búinn að setja trúverðugleika þinn niður fyrir núllið.............

[Jón Gunnar Bjarkan, 22.11.2010 kl. 23:12]

Já þar sem þú ert reyndar að ráðast þarna á trúverðuleikan minn varðandi það sem ég sagði um kreppuna þá er kannski best að við tökum fyrst hvers vegna það er enginn þjóð að fara í gegnum sambærilega kreppu og Ísland.

Reyndar nennti ég ekki að lesa allan þennan pistil en það er augljóst að maðurinn veit ekkert um ástandið á íslandi, samt er fyrisögnin yfir þeirri málsgrein "Ísland verr statt með evruna" enda talar hann eins og álfur út úr hól í því sambandi að evran hafi gert hlutina verri fyrir írskan almenning(og gefur skyn verra en fyrir almenning á íslandi) enda þótt hann taki auðvitað enginn dæmi máli sínu til stuðnings. Það þætti mönnum mikil undur og stórvirki ef þeir opnuðu gluggapóstinn sinn og sjá húsnæðislán sín hafa tvöfaldast eins og stór hluti íslenskra fjölskyldna(og þau sem hafa íslensk lán hafa ekki séð höfuðstólinn lækka í marga áratugi). Hérna er því verið að tala um nokkra ef ekki tugi milljóna króna kostnað á almenning á íslandi sem írskur almenningur er blessunarlegar laus við. 

Hann talar um að laun þyrfi að skerðast á Írlandi, ég hef ekki séð neitt plan um aðgerðir til launalækkana, hvorki á Írlandi né Grikklandi. Íslendingar tóku á sig feikilega launalækkun í gegnum gengisfelling, jafnvel þó írar muni fari í launalækkanir þá yrðu þær aldrei nema 1/3 af þeim launalækkunum sem við höfum farið í.

Ef við horfum yfir á macroeconomic levelið í staðinn fyrir almenning að þá er Írland að fá inn erlenda fjárfestingu, og reyndar hefur hún aukist mjög í kreppunni, til dæmis las ég hérna á blogginu að erlend fjárfesting í upplýsingatæknigeiranum í Írlandi hafi ekki verið hærri í sjö ár, meiri heldur í þessu svaðalega góðæri sem ríkti í heiminum upp úr aldamótum. Þeir eru ekki með gjaldeyrishöft. Svo eru þeir með um 4-5 falt lægri stýrivexti. 

Það Írland og Ísland eru bæði að fara í gegnum er stóraukið atvinnuleysi, við erum farinn að slaga upp í ESB, hver hefði trúað því fyrir nokkrum árum. Írland er þó með töluvert meira. Sjá tölur hérna frá Eurostat, alltaf miðaðar við sama mánuð til eyða út árstíðabundnum sveiflum:

http://en.wikipedia.org/wiki/Eurozone_unemployment#Unemployment

Við erum bæði að glíma við gríðarlegar háar þjóðarskuldir, þeirra þjóðarskuldir eru þó viðráðanlegri þar sem þær eru mest í þeirra eigin gjaldmiðli. Við erum bæði að glíma við fjárlagahalla, þeirra innspýting í bankakerfið fer í fjárlagahallann, okkar bankahrun tókum við með stóraukinni skuldabyrði. 

Svo veit ég ekki með hvort það sé landflótti af menntuðu fólki frá Írlandi eins og hér á Íslandi nú um stundir en mér skilst að það sé að skella á stjórnmálakreppa þar í landi eins og við sitjum í líka. 

Sumsé, þessi kreppa mun kosta írskan almenning svipaðan niðurskurð og skattahækkanir sem við erum að fara í gegnum en íslenskar fjölskyldur bæta nokkrum til tugum milljóna á sig í aukinni skuldabyrði. Það er augljóst hvort reynist almenning betur, evran eða krónan.

[Jóhann Elíasson, 22.11.2010 kl. 23:34]

Í öllu Háskólanámi er lagt blátt bann við því að nota Wikipedia sem heimild þú þarft að vanda upplýsingaöflun þína, jafnvel þótt þú sért að skrifa SKÁLDSÖGU.........

[Jón Gunnar Bjarkan, 23.11.2010 kl. 00:40]

Ja hérna, ég bjóst nú alla vega við meiri umræðu um málið en þú bara leggst á bakið og gefst upp og talar um skáldsögu. Þeir eru nú margir brjóstumkennanlegir heimsýnarmennirnir en þetta er nú allra versta frammistaða sem ég hef hitt á.

Það er ekkert að því að nota wikipedia, og reyndar áreiðanlegra en upplýsingar sem þú færð út úr blöðum og sjónvarpir. Þeir eru nefnilega með alveg frábærlega gott kerfi til að vísa á heimildir. Ef fullyrðing er sett inn á vefinn sem þykir vafasöm þá er tekið fram að heimild vantar, þetta er miklu fagmannlegri framsetning en í dagblöðum á Íslandi til dæmis. Þér er velkomið að fact tékka allar þessar tölur ef þú vilt. 

[Jóhann Elíasson, 23.11.2010 kl. 08:27]

Þetta er ósköp einfalt Jón Bjarkan, þú hélst áfram að vitna í ómarktækar heimildir og hélst áfram með órökstudda lygaþvælu, spyrtir mig við Heimssýn, samtök sem ég á ekki nokkra aðild að og mun ekki eiga.  Það er eitt að vera harður aðildarsinni en það er annað að rökstyðja það með falsi og lygum en þér er kannski vorkunn vegna þess að þú leitar ekki staðfestingar á sannleiksgildi þess sem fyrir þig er lagt og notar svo óritrýndan vef sem heimild (Wikipedia) fyrir bullinu í þér.

[Jón Gunnar Bjarkan, 23.11.2010 kl. 14:06]

Nei Jóhann, þú byrjaðir með allskyns rugl um óskhyggju og setja út á trúverðugleika minn, síðan þegar ég fer að rökræða málið þá ferðu að tala um skáldsögu og reynir að setja út á fullkomlega góðar heimildir. En leggur svo ekkert til málanna sjálfur enda er mig farið að gruna að þú vitir ekkert um efnahagsmál.

Hvað er það sem þig vantar heimildir fyrir vinurinn?

Ekki þarftu að fá heimildir fyrir því stóraukinni skuldaaukningu heimila, fyrirtækja, sveitarfélaga og orkuveitunnar vegna þess að krónan hefur hrunið og ekki þarftu heimildir fyrir því að írar séu lausir við það, þetta segir sig sjálft.

Ekki þarftu heimildir fyrir því að atvinnuleysi hefur stóraukist í báðum löndum enda er ég búinn að vísa þér í tölur frá eurostat, enda þótt ég viðurkenni að atvinnuleysi á írlandi er töluvert meira en á ísland eins og ég sagði að ofan.

Til að finna ríkisskuldirnar farðu þá til dæmis og googlaðu Government debt(eða public debt, sami hluturinn). Til dæmis á CIA world "fact" book. Þar eru þjóðarskuldir íslendinga 107% af þjóðarframleiðslu en Írar reyndar ekki með nema 57%af GDP(þetta er reyndar ekki updatated mat og það er talað um að Írar muni enda í 100% af Þjóðarframleiðslu sem er eins og ég segi svipaðar þjóðarskuldir og við höfum).

Landflóttan sem ég talaði um getur þú svo séð á tölum hagstofunnar en þetta hefur margoft kemur fram í fréttum og umræðuþáttum. En eins og ég segi, veit ekki hvort það sama sé upp á teningnum í Írlandi. 

Þú talar um að heimildin sé wikipedia, wikipedia er bara vefurinn þar sem tölurnar og heimildirnar eru birtar. Ég tek enn og aftur fram að ég tel Wikipedia eitt besta tól sem fólk hefur í upplýsingaöflun í mannkynssögunni. Það er til dæmis nánast ómögulegt að halda úti vafasömum áróðri á wikipedia sem fjölmiðlar á vesturlöndum er langt frá því að vera lausir við.Tökum dæmi. Til dæmis er Morgunblaðið gegn ESB inngöngu en Fréttablaðið fyrir inngöngu, í þessum blöðum er því svolítið fjallað um málið frá einni hlið sem ritstjórunum þóknast(en umfjöllun er vandaðri í fréttablaðinu að mínu mati). Lesendur sem eru ósammála geta ekki farið og sett innskot inn í fullyrðingar sem þeim vafasamar, þar sem innskotið gæti bent á að þetta eða hitt sé umdeilt og komið með heimildir fyrir því. Þetta er ástæðan fyrir því að wikipedia er mjög góður vefur til upplýsingaröflunar. Eins og ég segi, ef þú ert ósáttur við að lesa þessar atvinnuleysistölur á wikipedia, farðu þá tenglana sem eru heimildirnar, á eurostat. Tölurnar breytast ekkert hvort sem þú sért á wikipedia eða eurostat. 

Og svo að lokum, bara til að leiðrétta enn eina vitleysuna í þér, að þá er wikipedia ritskoðaður vefur. 

[Jóhann Elíasson, 23.11.2010 kl. 23:17]

Það sýnir hvað þú ert raunveruleikafirrtur, Jón Bjarkan, að kalla þessa þvælu þína RÖKRÆÐUR.  Það liggur við að maður vorkenni þér.

[Páll (IP-tala skráð) 24.11.2010 kl. 00:01]

Mér sýnist nú Jón Gunnar komast margfalt betur út úr þessum samræðum ykkar en þú Jóhann. Af hverju reynirðu ekki að hnekkja hans orðum með einhverju af viti í stað þess að kasta fram klaufalegum blammeringum?