Hugðist slíta sambandinu!!!!

Unga konan, sem banað var síðdegis í gær af unnusta sínum og barnsföður, hugðist slíta sambandi þeirra og flytjast með ungan son þeirra á brott, samkvæmt heimildum Morgunblaðsins. Um sambandsslitin ræddu þau í Heiðmörk þegar maðurinn réðst á konuna og veitti áverka sem leiddu til dauða hennar.

Parið bjó í Hafnarfirði ásamt syni þeirra á þriðja aldursári. Fjögur ár eru síðan þau trúlofuðu sig. Samkvæmt heimildum Morgunblaðsins hafði stúlkan um einhvern tíma íhugað að slíta trúlofuninni og meðal annars viðrað þær áætlanir við foreldra sína.

Maðurinn tók áætlunum konunnar illa og síðdegis á fimmtudag ók hann með hana upp í Heiðmörk þar sem þau ræddu málin. Umræðan leiddi til rifrildis og upp úr því réðst hann á konuna. Á meðan þessu stóð var sonur þeirra í bílnum.

Í kjölfarið ók maðurinn til foreldra sinna og skildi barnið þar eftir. Þá hélt hann að Landspítalanum í Fossvogi þar sem hann gaf sig fram og vísaði á lík konunnar í farangursgeymslu bílsins.

Rannsókn lögreglu miðar vel og málsatvik eru að mestu ljós. Maðurinn var fyrr í dag úrskurðaður í gæsluvarðhald til 27. maí nk. Hann á eftir að gangast undir geðrannsókn. Barnið var fært í umsjá barnaverndaryfirvalda. //þetta er skelfilegt og skíringarlaust, fyrir okkur að svona skuli ske,megi góður Guð vera að þessu blessaða fólki /Halli gamli