Áslaug María sækist eftir 4. sætinu/gott að fá fleiri konur þarna!!!!

Áslaug María sækist eftir 4. sætinu
Innlent | mbl | 22.12.2009 | 19:54
Áslaug María Friðriksdóttir, formaður Hvatar og varaborgarfulltrúi, hefur tilkynnt um framboð sitt í 4. sætið á lista sjálfstæðismanna í Reykjavík, í prófkjörinu 23. janúar, vegna komandi borgarstjórnarkosninga.

Áslaug María, sem fer nú í prófkjör í fyrsta sinn, hefur sem varaborgarfulltrúi gegnt ýmsum trúnaðarstörfum fyrir Reykjavíkurborg frá 2006. Hún er formaður menningar- og ferðamálaráðs Reykjavíkur, situr í umhverfis- og samgönguráði og sat áður í leikskólaráði. Áslaug stofnaði fyrirtækið Sjá viðmótsprófanir ehf. Fyrirtækið var það fyrsta sinnar tegundar á Íslandi og hefur verið leiðandi á sviði rannsókna og úttekta á notendahegðun á vefnum, segir í tilkynningu frá henni.

Áslaug María situr í miðstjórn Sjálfstæðisflokksins, var fyrst kjörin á landsfundi 2007 og svo endurkjörin 2009. Hún hefur verið formaður Hvatar, félags Sjálfstæðiskvenna frá 2006.

Í yfirlýsingunni segist Áslaug María hafa áhuga á borgarmálunum og vera reiðubúin að slást í hóp öflugra borgarfulltrúa Sjálfstæðisflokksins undir stjórn Hönnu Birnu Kristjánsdóttur.

Áslaug María er með mastersgráðu í vinnusálfræði frá University of Hertfordshire í Englandi. Hún er framkvæmdastjóri Sjá ehf. Áður var Áslaug deildarsérfræðingur í félagsmálaráðuneytinu og sinnti þar málefnum fatlaðra og félagsþjónustu sveitarfélaga.

Hún er fædd og uppalin í Reykjavík. Sambýlismaður Áslaugar er Hjálmar Edwardsson og eiga þau tvo drengi en Áslaug á jafnframt eina dóttur. Foreldrar Áslaugar Maríu eru Friðrik Sophusson, fyrrverandi forstjóri, ráðherra og varaformaður Sjálfstæðisflokksins og Helga Jóakimsdóttir, hárgreiðslumeistari og alexandertæknikennari.///við bjóðum hana velkomna i prófkjörið okkar sjálfstæðismanna,það er gott að hafa þarna fleiri konur og vonandi að það verði til þess að fleiri konur kjósi flokkinn og einnig yngra fólkið þessa er framtíðin/Halli gamli

Áslaug María sækist eftir 4. sætinu